علّق مرتضى منصور، رئيس نادي الزمالك، على سباب الجماهير، في المواجهة الماضية بين الأهلي وبيراميدز، حيث تعرض لاعبو بيراميدز إلى السباب بشكل كبير.
وقال مرتضى منصور خلال فيديو عبر صفحته: فين مجلس إدارة الأهلي من السباب اللي تعرض له لاعبي بيراميدز، وفين الكابتن اللي مسمي نفسه أسطورة، الاسطورة بالأخلاق مش بالتدبير والتخطيط.
وأضاف رئيس الزمالك: مش هو ده مش رمضان صبحي؛ اللاعب التاريخي للأهلي، وده شريف إكرامي إللي ياما فرح الجماهير.. شوية عيال بلطجية يشتموهم.
واستكمل: أحمد فتحي كان جاي الزمالك، وشريف إكرامي طلب من أبوه ييجي الزمالك من 4 سنين، ورفض وقالي: لا أحنا أهلي، وباقوله شفت بقى الجماهير عملت فيك إيه.
وأوضح مرتضى منصور: عبد الله السعيد اللي جماهير الأهلي شتمته.. كانت بتعيط عشان يجدد عقده لما وقّع مع الزمالك؛ اللي حصل ما ينفعش.
وتابع رئيس نادي الزمالك: بقول لوزير الرياضة.. هو ليه جماهير الأهلي في ماتش بيراميدز حضروا 5 آلاف، وعندنا أحنا مبيدخلش حد وبتعطل تذكرتي.. هما دول مش نفس اللاعيبه.
وتسائل مرتضى منصور: ليه ما يحضرش 50 ألف في مباراة الزمالك والوداد؟، ده ماتش مصر والسنغال هايحضر 60 ألف.. طب أيه الفرق، وأنت عارف أن جماهيرنا ملتزمة.
واختتم منصور حديثه: بقول لجماهير الزمالك أوعوا تغلطوا في الأهلي أو صالح سليم.. أحنا محترمين ومؤدبين، ولن ننساق وراء هذه الفتنة.
