فيديو.. "ده هينزلنا بمطواة".. البلدوزر يهاجم الأهلي بسبب صفقة سافيو

معاذ محمد
منذ 4 أشهر
مجدي عبد الغني

علق مجدي عبد الغني، نجم الأهلي السابق، على تعاقد النادي الأهلي مع البرازيلي برونو سافيو، جناح فريق بوليفار البوليفي، خلال فترة الانتقالات الصيفية الجارية.

كان النادي الأهلي أعلن التعاقد مع سافيو، لمدة 3 سنوات مقبلة، قادمًا من فريق بوليفار البوليفي. وأصبح اللاعب مهددًا بالإيقاف بسبب اعتدائه على الحكم خلال إحدى مباريات فريقه في الدوري البوليفي.

وقال مجدي عبد الغني، في تصريحات تليفزيونية عبر فضائية "الشمس": "واضح من الفيديو إن برونو سافيو، عصبي جدًا.. الأندية اللي بتتعاقد مع لاعب أجنبي مش بتدفع أرز ومكرونة، دي بتدفع فلوس وبالدولار، بتدفع فلوس بالعملة الصعبة وإحنا عندنا أزمة فيها، والعالم كله عارف إن إحنا عندنا أزمة في الدولار وصندوق النقد الدولي يعلم ذلك، أنديتنا مش عارفة إننا عندنا مشاكل في الدولار؟ هما عشان جابوا الدولار سهل الأمور عندهم بقت سهلة، أنا بتكلم على أندية مصر كلها اللي بتتعاقد مع لاعب بالدولار دون أن تتحرى الدقة".

وأضاف: "أنا النهاردة تعاقدت مع اللاعب وواضح جدًا من الفيديوهات أنه عصبي، الموضوع مش بتاعه ودخل حط نفسه في الموضوع  وعاوز يضرب الحكم! الكلام ده لو حصل هنا في مصر، لجنة المسابقات من الممكن تصدر قرار بإيقافه لنهاية الموسم، إحنا جايبين لاعب يلعب ولا يطرد!".

وواصل: "إحنا عاوزين توضيح من الأهلي لموضوع برونو سافيو، إحنا بقالنا 3 أيام بنسمع كلام عن سافيو، ولا نعرف الحقيقة، ياريت اللجنة الإعلامية في الأهلي تخرج توضح لنا الحقيقة، هل اللاعب هيكون حر في 31 ديسمبر المقبل؟ هذا هو الكلام الذي يقال ونحن لا نعلم مدى صحته".

وأردف: "أنا لو في لجنة التعاقدات بالنادي الأهلي وشوفت هذا الفيديو عمري ما أتعاقد مع لاعب زي ده مهما كانت مهاراته، واحد بيفقد أعصابه بهذا الشكل لا يمكن أتعاقد معاه أبدًا، لو هو اللي هيجيب الإجوان كلها"، مضيفًا: "أنا اتعصبت مرة اتوقفت لأجل غير مسمى، جوه النادي الأهلي، وأنا كنت رقم واحد في الفريق، أتحط وبعد كده يتحط باقي التشكب.. النادي الأهلي  مش بتاع واحد يفقد أعصابه".

وأكمل: "أنا لازم لما أشتري لاعب وأدفع فيه ملايين لازم أبقى شايفه ومتابعه مش أعتمد على شرائط الفيديو،  إنما أروح أحط مليون و500 ألف دولار في لاعب على شريط فيديو! إيه اللي بتعممله أندية مصر دي!".

وأشار: "الإسماعيلي والزمالك اتضربوا قبل كده في لاعيبة عشان اتفرجوا عليهم في فيديو وخدوهم على اسمهم القديم، نادي الزمالك كان عنده مشاكل مع مجموعة من اللاعيبه دفعوه مبالغ طائلة، اتعاقد مع أجوجو، على أساس أنه أجوجو، بتاع زمان ومطلعش بتاع زمان".

وأردف: "أنا مش هتعاقد ولا بالتاريخ ولا بالفيديو، لو هنتعاقد بالتاريخ كان زمنا بنتعاقد دلوقتي ومش عارفين نلمس الكورة أصلاً، لو على التاريخ  كان زمان النجوم الكبار زي حسن شحاتة والخطيب ومصطفى عبده وفاروق جعفر، بيتعاقدوا لحد دلوقتي عندهم فيديوهات تكسر الدنيا، لكن الطبيعة بتقول إنهم مش قادرين يرفعوا رجليهم ولا يقدروا يتمشوا في الملعب، ممكن اللاعب يكون في قمة عطائه، وفي فترة قصيرة أصبح غير قادر على اللعب، لذلك لازم أتابع اللاعيب وأشوفه خاصة لو هدفع ملايين، أنا مش هديهم بلح عشان يدونا مكانه قمح، هي مش مواد غذائية دي فلوس بتدفع".

واسترسل: "إحنا محتاجين توضيح من الأهلي بشأن التعاقد مع سافيو، وحقيقة انتهاء عقد اللاعب في نهاية ديسمبر المقبل"، مضيفًا: "سافيو، لاعب عصبي، والموضوع مش بتاعه، جاء من مكانه على الحكم ليعترض عليه، اضطر الحكم إنه يطرده، اللاعب عاوز يضرب الحكم بعد الطرد، هو ده ينفع! ده ممكن ينزلنا بمطواه، ده لاعب مش عارف يتحكم في نفسه".

واختتم مجدي عبد الغني تصريحاته قائلاً: "أنا معرفش سافيو، وماليش علاقة بمستواه الفني، إحنا هنا بنتكلم على أخلاق اللاعب والجانب التربوي، لاعب بهذا الشكل هيتوقف كل مباراة بدل ما هنعدله هيجيب كام جون هنعدله هياخد كام كارت أحمر.. لا بد أن يكون هناك دقة من جميع أندية مصر أثناء التعاقد مع اللاعبين الأجانب".

التعليقات